تعليمات هامة

  • وهنا فى هذه الصفحة اضع لكم بعض التعليمات والتلميحات الهامة لكى لا تقع فى الاخطاء المعروفة فى مواقع معينة او استخدام برامج معينة فى بعض المواقع او تفادى عمل اى شيئ بطريق الخطا سواء (مقصود او غير مقصود) منك.
  • واليكم بعض التعليمات الهامة والتى يجب فهمها جيدا:

    1- متعملش فيها ذكى/فتك وتفتح حسابين من نفس الجهاز او من نفس الايبى والماك ادرس لجهازك لانه عاجلا او اجلا الحساب هيتقفل يعنى هيتقفل - ومش هتقدر تعاند معاهم وفلوسك هتطير فى الهوا ومش هتقدر تسحبها - وبرضو الكلام ده ينطبق عليك اذا كان عندك جهازين او 3 وفاكر انه من كل جهاز تقدر تفتح حساب منفرد - هيعرفو برضو وهيقارنو البيانات الموجودة والمسجلة بكل حساب وهيحذفو الحسابات المشابهه لبعضها او يوقفوها كلها - وبرضو مجهودك هيضيع عالفاضى.

    2- متخشش/متدخلش على حسابك من اى جهاز تانى غير جهازك (سواء جهاز كمبيوتر او لابتوب) حتى لو كان جهاز اخوك وده للاحتياطات الامنية مش اكتر لانه بعد كده ممكن ييجى صاحب الجهاز نفسه ويقعد يراجع المواقع اللى انت شوفتها عنده على الجهاز - حقه ومتقدرش تقول له حاجة - وممكن يدخل على حسابك باى موقع من المواقع ويستعمله (سواء بالسلب او الايجاب) على انه حسابه هو وهيكون متحكم فيه كامل التحكم - طبعا ده اذا سجلت البسورد على متصفح الجهاز او نسيت اليوزرنيم او الاميل (خاصية التذكير بالمتصفحات) تبقى كانك عطيت حسابك لغيرك.

    3- نفس الكلام لو روحت سيبر نت او كافيه - متدخلش على اى حساب فيه فلوس او اى حساب من حساباتك البنكية على الانترنت - لانك كده انت هتخرب على نفسك وعلى شغلك بايدك - وتعبك ومجهودك هيروح عالفاضى.
     
    4- نفس الكلام برضو لو انت روحت فى اى مكان عام فيه اجهزة نت او تغطية لشبكات تقدر تلقط منها النت من على بعد (واى فاى) متضمنش الناس اللى شغالة على الشبكة ممكن تعمل ايه - او واحد منهم يحاول يتجسس علي جهازك عشان يسرق البسورد وانت متعرفش ومش هتقدر تعرفه.

    5- استخدم جهازك انت بس (سواء كمبيوتر او لابتوب) عشان تقدر تتحكم بحساباتك وملفاتك من مكان واحد - حتى فى استخدام الشبكات الهوائية استخدم شبكة نت تكون انت واثق فيها وعارف اصحابها واكيد يكون معاك البسورد اللى قالولك عليه عشان تقدر تخش الشبكة وانت مطمئن ان محدش بيتجسس على جهازك.


    • واعتقد انه دى بعض التلميحات والنصايح - مش كلها - عشان على الاقل تقدر تبدا بيها مع نفسك وتفهم اى شئ ممكن يحصل معاك بخصوص المواقع الربحية.


    • اتمنى يكون الكلام مفيد ليكم وتكون التعليقات بناءة ومحترمة على الصفحة.